Upat ka CCPO polis gipadala isip UN peacekeepers

Upat ka mga sakop sa Cebu City Police Office ang gikuha sa United Nations Security Forces aron moserbisyo sa mga nasud nga dunay misyon ang UN.

Una nang nakabiya alang sa UN mission si PO2 Ruth Violanggo niadtong Septiyembre 26 pangadto sa nasud sa Kosovo, usa sa mga nasud sa Uropa nga dunay civil war niadto pang mid-90s apan hangtud karon wala pa mabalik sa normal ang kinabuhi sa mga tawo ug miresulta sa kamatayon sa libuan ug pagkaguba sa kinabuhi sa mga tawo didto.

Sumala pang Comendador, si Violanggo maoy labing unang babayeng polis gikan sa Police Regional Office –7 nga gipadala sa UN mission, siya gikatakdang mahisakop sa usa ka elite investigation unit sa UN nga molutos sa mga war crime criminals.

Samtang misunod nga mibiya mao si PO2 Wendell Abellana duha pa ka semana ang nakalabay aron molangkob sa gibana-banang 125 ka tropa sa Pilipinas diha sa maong nasud ilawom sa United Nations Stabilization Mission in Haiti (MINUSTAH).

 Si Abellana sakop sa Special Weapons and Tactics sa CCPO ug gidestino karon sa nasud sa Haiti nga duna gihapoy civil war human moeskapo  ilang pangulong si Jean-Bertrand Aristide.

Karong Nobiyembre 27, gikatakdang mosunod nga mobiya ang kanhi hepe sa Theft and Robbery Section nga si Chief Insp. Alexis Relado ug Sr. Insp. Emily Santos alang sa UN mission sa nasud sa East Timor nga susama sa nahaunang mga nahisgutang nasud duna gihapoy civil war.

Matud pang Sr. Supt. Patrocinio Comendador dako kaayog kaayuhan alang sa maong mga polis ang madestino sa UN mission alang sa ilang career.

Nunot niini, mihimo og gamay’ng lahugay si Comendador sa CCPO, si Sr.Insp. Michael Anthony Bastes mao nay hepe sa TRS, si Sarahjane Recla nga deputy ni Relado sa TRS mao na karon ang supervisor sa mountain cops sa Service Security Group.

Samtang si Sr.Insp. Cheryl Ramos maoy mohulip kang  Bastes sa General Investigation sa Criminal Investigation and Intelligence Branch ug si Insp. Juanito Pajantoy sa Station 10 ibalhin sa CIIB ug si Insp. Pablito Sarno sa mountain cops ibalhin sa Station 10.