Lola gitulis, gipatay

Usa ka tigulang babaye ang gitulis ug gipatay sa wala mailhing tulisan sulod sa ilang pinuy-anan samtang sila rang duha uban sa iyang bana nga paralisado niadtong Martes sa tungang gabii diha sa barangay Esperanza bukirang bahin gibana-banang 15 ka kilometro ang gilay-on gikan sa Poblacion Aloguinsan.

Ang wala mailhing tulisan milampos pagdala sa kuwarta nga P15,000 nga gibutang sa tuong bukton sa biktima nga gisulod og gamay nga pitaka.

Si SPO1 Gregorio Dayanan, Officer in Charge (OIC) nga nahinabi sa Banat News miila sa biktima nga si Modesta Barillano, 78, ug residente sa maong dapit.

Si Reynaldo Barillano, apo sa namatay maoy mitaho sa kapolisan labot sa maong pagpanulis.

Base sa gihimong imbestigasyon sa kapolisan nasayran nga sila rang duha ang managtiayon sa ilang panimalay nangatulog.

Kalit lang gisulod sa wala mailhing tulisan ang panimalay sa biktima ug niagi sa gamay’ng abli sa balay lahos na ngadto sa sulod diin naghigda ang managtiayon.

Gikatahong gituok ang liog sa biktima sa wala mailhing tulisan hangtud nga nakabsan sa iyang kinabuhi ug namatay.

Dihadiha gikuha ang kuwarta nga gitangkil sa bukton nga nagkantidad og P15,000.

Matud ni SPO1 Dayanan nga bag-ohay lang niuli ang anak sa biktima nga usa ka seaman ug gipangtagaan og kuwarta ang managtiayon.

“Murag gituok pero nay gaingon nga basin giataki kuno,” pulong pa ni SPO1 Dayanan.

Giangkon ni Dayanan nga hangtud karun blangko pa gihapon sila sa ilang imbestigasyon pag-ila sa responsabli sanglit ang mga silingan nga namuyo puro lang mga kaliwat sa managtiayon.

Niingon si Dayanan nga iyang giingnan ang anak nga seaman nga kung gusto nilang ipa-autopsy ang biktima mo-request lang kanila tungod kay gilubong naman sa mga anak ug kabanay ang biktima.