Forum sa D’bantayan gihangop sa mga brgy

Gipatambong sa Civil Military Police Forum ang mga daan ug bag-ong mga opisyal sa kabarangayan sa lungsod sa Daanbantayan kagahapon.

Ang kalihukan gipasiugdahan sa armadong kusog sa nasud ingon man sa kapolisan sa lalawigan sa Sugbu.

Atol sa kalihukan, nasayran sa presentasyon sa 3rd Civil Relations Group, Civil Relation Service Armed Forces of the Philippines nga duna nay duha ka barangay sa lungsod sa Daanbantayan nga hinayhinay nang gisudlan sa legal front sa Communist Party of the Philippines.

Ang Bayan Muna partylist dunay chapter sa barangay Tinubdan.

Ang speaker bureau sa 3rd CRG, CRSAFP nga si Jade Oscar, mipahibawo nga ang lalawigan sa Sugbu dunay 264 na ka sectoral organizations ubos sa legal front sa CPP-New Peoples Army-National Democratic Front (CPP-NPA-NDF).

Kini naglakip sa mga kabus nga taga dakbayan, kabatan-onan, mag-uuma, kababayen-an, partylist, mananagat, relihiyosong pundok, mamumuo ug transportasyon.

Usa niini ang Panaghugpong sa Mag-uuma sa Dalingding sa barangay Dalingding, lungsod sa Daanbantayan.

Nasayran nga ang mga mananagat ug mga mag-uuma sa lungsod sa Daanbantayan ang target sa pundok sa mga komunista.

Nunot niini ang kadagkoan sa military ug kapolisan nanawagan sa mga opisyales sa kabarangayan nga motabang sa pagmonitor sa kalihukan sa mga sectoral organizations sa tagsatagsa ka barangay aron malikayan nga makakuyanap ang komunismo.