Tulo ka tinun-an sa kursong nursing ug nipailawom sa internship sa Danao District Hospital ang gitulis sa duha ka lalaki nga armado og .45 nga pistola ug revolver kagahapon sa kaadlawon sa dalan Duterte barangay Suba.
Ang duha ka wala mailhing tulisan milampos pagkuha sa tulo ka cellphone ug duha ka bag nga dunay sulod nga medical equipment para gamiton sa internship.
Mitaho sa kapolisan sa siyudad sa Danao ang tulo ka mga tinun-an sa nursing nga sila si Arthur Derecho, 23, residente sa Capitol site dakbayan sa Sugbu, Joseph Eugenio, 23, residente sa Zapatera ug Goldamer Garcia, minyo nga taga Labogon Mandaue.
Matud pang SPO4 Teofilo Deguilmo sa Banat News ang tulo miasoy kanila nga sila naglakaw paingon sa Danao District Hospital apan sa dihang pag-abot sa nahitaboan kalit lang nibabag sa ilang agianan ang duha ka wala mailhing tulisan ug mition kanila og armas dayong deklarar og tulis.
Usa sa duha ka tulisan maoy nition og .45 nga pistola ngadto sa tulo ka biktima samtang ang usa nagtion usab og revolver.
Sumala pang Deguilmo nga gipugos gyud pagkuha sa duha ka tulisan ang nahisgutang mga butang ug pagkahuman yano ra kaayong nanglakaw palayo sa dapit.
Matud ni Deguilmo nga ila karung susihon kung susama raba nga grupo nga taga Compostela Carmen ang niigo sa tulo ka mga tinun-anan.