Mosyon ni Jovan wala ikabalaka sa CAV – Chiong

Wala mabalaka si Mrs. Thelma Chiong sa Crusade Against Violence (CAV) labot sa lakang sa mga abogado ni Jovan Fernandez, anak ni Mayor Socrates Fernandez sa Talisay   nga moduso og motion to demurrer of evidence aron mabasura ang kasong kriminal  human usab gisirhan sa prosekusyon ang maong kaso gumikan sa pagsibog sa mga testigos.

Sa nasayran, si Jovan nag-atubang og kasong murder ingon man frustrated murder human iyang gipusil patay si Panpilo Baringue usa ka driver ingon man pagkaangol sa kauban niining konduktor niadtong Agosto 29, sa miaging tuig didto sa dakbayan sa Talisay.

Si Chiong nagkanayon nga wala na siya mahulga pa ning maong isyu kini tungod kay aduna silay mga dukomento nga ang mga testigos nga ilang gitabangan mipirma  og affidavit sa korte.

Si Chiong nagkanayon nga wala niya igsapayan ang pagsibog sa mga testigos kini tungod kay sa gihimo niini hayan ma-isyuhan kini og warrant sa korte ug dakpon.

Subay niini mipadayag siya sa iyang kasagmuyo sa mga testigos kinsa iyang gitabangan niadto nga wala lang gyud mipahibalo kanila nga mosibog sa maong kaso nga siya ug ang ilang grupo motahod usab niini.

Hinuon iyang gipadayag nga dili usab niya mabasol ang maong mga testigos gumikan sa kapobre ingon man sa kahadlok, nagpabayad na lang kini ug misibog sa pagtestigos inay kay sa motabang nga mahatagan og hustisya ang biktima.

Sa nasayran nga misibaw karon ang isyu diha sa Talisay nga ang mga testigos gibayran matud pa sa kampo ni Jovan bugti sa pag-atras sa naunang affidavit.

Samtang gikataho usab nga ang usa sa mga anak sa biktima nga si Baringue gipatrabaho na sa City Hall sa dakbayan sa Talisay