Manganak sa district hospital na

Gipalihok karon sa Department of Health (DOH) ang kagamhanan sa lalawigan aron kadtong manganakay nga inahan adto na paangka sa mga district hospital sa kalungsoran ug dili na dad-on nganhi sa Vicente Sotto Memorial Medical Center (VSMMC).

Matud pa ni Suzette Limbaga, tigpamaba sa DOH-7 nga ang VSMMC usa ka tertiary hospital diin ang angayang tambalan diha mao ang mga dagkong balatian sama sa kidney, kasingkasing, ug uban pang sakit nga nagkinahanglan og operasyon.

Apan makapasubo kaayo karon kay bisan ang mga manganakay gikan sa kalungsoran dad-on pa diha sa VSMMC hinungdan nga maghuot kanunay ang maong tambalanan, matud pa ni Limbaga.

Gani gidayeg sa DOH ang lakang sa kagamhanan sa dakbayan sa Sugbu sa paggamit sa ilang mga health centers sa kabarangayan aron himuong “birthing center” kun sentro  sa manganakay.

Kini gitumong aron nga dili maghuot kanunay ang Cebu City Medical Center (CCMC) ang tambalanan sa dakbayan sa Sugbu.

Miingon si Limbaga  nga ingon niini ang gipangandoy sa DOH nga sagupong lakang ni Gobernador Gwendolyn  Garcia aron ang mga manganakay sa kalungsoran adto na paanaka sa mga district hospital ug dili na dad-on diha sa VSMMC.

Miingon si Limbaga nga sa mga district hospital daghan kaayong mga kasaligang mga midwife kansang hiantigohan dili magamit kay ang mga manganakay nga inahan sa ilang lungsod moanhi man sa VSMMC.