Ambulant vendors sa Pasil did-an maninda sugod Nov.15

Did-an na unyang makapaninda ang kapin sa 200 ka mga ambulant vendors diha sa Pasil Fish Market sugod karong Nobiyembre 15.

Kini maoy gipahibawo ni Cebu City Market Administrator Racquel Arce, human usab mapakyas ang mga vendors pagtuman sa ilang gilagdaan nga Affidavit of Undertaking.

Ang Affidavit of Undertaking naglakip sa pagbayad og P42 nga sinimanang space rental, pagmintinar sa kalimpyo sa ilang palibot, pagsul-ob og I.D. ug uban pa.

Nasuta usab sa kadagkuan sa Market Authority nga ang nahisgutang mga vendors wala mulukat og business permit sa City Hall.

Kasagaran sa maapektahang mga manindahay giingong mga sakop sa Pasil Sawang Calero Ambulant Vendors Association  (PASACAVA).

Suma ni Arce nga sakmiton unya sa market police ang mga baligya sa mga manindahay nga magmagahi pagtuman sa maong kamanduan.

Mga isda, lamas, ug uban pa maoy sagad gipamaligya sa mga ambulant vendors nga anaa nagpahimutang sa tunga-tungang bahin sa Pasil Phase 1.

Giklaro hinoon sa City Market Administrator nga ilang hatagan og higayon makabalik pagpaninda ang mga vendors diha sa ilang mga puwesto.

Apan gitataw ni Arce kini kinahanglang mosunod sa gilatid nga mga kondisyon ug sa gikinahanglang mga rekisitos.

Usa niini mao ang  pagkuha og certification gikan sa City Treasurer’s Office nga magpamatuod nga wala nay utang sa siyudad.

Laing kondisyon niingon si Arce, mao ang pagpirma og bag-ong Affidavit of Undertaking ug sa hingpit nga pagsunod sa nalatid niini.-