"Mahuyang", 2 ka menor gipamusil

Grabeng naangol ang usa ka bayot nga napagan sa pagpamusil uban sa duha ka managsoong nga menor de edad dihang gipamusil  ang duha ka sakop sa Alpha Kappa Rho (Akrho)  sa purok Agbate, barangay Cambaro, dakbayan sa Mandaue.

Si Inspector Pat Padaon,  hepe sa Presinto 5 sa Opao Police Station  miila sa bayot nga naangol nga   si Daniel Panimdim Labra, 37  bayot, nga taga Gotchan, barangay Mambaling, dakbayan sa Sugbu.

Dugang niyang giila nga mga naangol mao ang managsoon nga 13 ug 11 anyos nga pulos nagpuyo sa maong dapit.

Ang nagpusil sa mga biktima mao ang tulo ka wala hiilhing lalaki nga gibanabanang 20 ngadto sa 25 anyos ang panuigon, pulos naghupot og armas nga wala matino ang kalibre.

Nakaangkon og samad pinusilan sa bukobuko ang unang biktima ug ang duha ka managsoon nga pulos menor de edad ang nakabaton usab og samad pinusilan sa ilang kalawasan.

Matud pa ni Inspector  Padaon nga ang duha ka mga testigos  nagkanayon nga mga sakop sa  Akrho fraternity nga sila si Gilbert  Barientos, 18 ug usa ka 16 anyos  maoy kauban sa maong mahuyang nga nag-estorya sa maong dapit alas 10 pasado ang takna sa miaging gabii.

Ang duha ka wala hiilhing lalaki nga pulos batan-on kinsa mitumaw duol sa nag-parking nga traysikol ang kalit lang namusil sa duha ka sakop sa Akrho.

Human sa maong pagpamusil ang duha ka armadong lalaki dali nga nanagan paingon sa sitio Kapusoan sa barangay Cambaro sa ilang pagsibat pahilayo sa maong dapit.

Si Inspector Padaon miingon nga ang mga biktima dali nga gidala sa Mandaue City District Hospital apan gibalhin kini sa Vicente Sotto Memorial Medical Center sa dakbayan sa Sugbu.