Ideklarar ni Cebu City Schools Division Supt. Lorna Rances ang buwan sa Enero sunod tuig nga Sinulog Month sa publikong mga tunghaan sa dakbayan.
Subay niini, ang mga tinun-an sa siyudad pasayawon sa Sinulog dance steps matag buntag human sa flag ceremony sa dili pa mosulod sa klase.
Ang pagsayaw sa mga tinun-an sa Sinulog dance steps, giingong molungtad lang hinoon og singko minutos.
Matud ni Rances nga duha ang iyang tumong sa maong lakang samtang ang mga Sugbuanon mosaulog sa Enero isip buwan ni Senior Santo Niño.
“Maka-exercise ang mga tinun-an at the same time maka-celebrate pod ta sa buwan ni Sr. Sto. Niño sa buwan sa Enero,”sumala pa ni Rances.
Gipasabot ni Rances nga wala na kinahanglana nga mokuha og choreographer ang matag tunghaan tungod kay ang mga maestra na maoy motudlo sa sayaw.
Nagkanayon si Rances nga sa ingon niini nga paagi, masinati sa kabataan ang Sinulog bisan kung gidid-an ang mga tunghaan pagsalmot sa maong kalihukan.
“Kung mahimo atong i-involve ang tanang mga bata aron ila gyod nga ma-feel ang Sinulog kay every morning gud ni nila nga himo-on,”matud ni Rances.
Gitataw hinoon sa City Schools Division Superintendent nga dili pinugsanay ang pagpasalmot sa mga tinun-an sa pagsayaw sa Sinulog.
“Ako gyod nang klaruhon sa akong memorandum nga dili pinugsanay ang pagpasayaw kay duna may mga tinun-an nga lahi usab og relihiyon,” dugang pasabot ni Rances.
Miingon si Rances nga mahimo nga ang nahisgutang mga tinun-an himoon lang nga mga observer apan bukas kini nga moapil sa pagsayaw.
Tambag ni Rances ngadto sa mga tinun-an nga lain og tinuuhan nga isipon lang niini nga sila nag-exercise sa pagsayaw sa Sinulog.
Ang pagdeklarar sa buwan sa Enero nga Sinulog Month sa publikong mga tunghaan sa dakbayan maoy labing unang higayon sukad nahimong institusyon ang Sinulog.