Health centers sa siyudad lig-onon

Gipasalig karon ni Cebu City Councilor Christopher Alix ang pagpalig-on sa mga health center sa kabarangayan sa dakbayan pinaagi sa pagbutang sa mahinungdanong mga kagamitan ilabina sa mga tambal nga maoy labing gikinahanglan.

Labaw sa tanan, ang pagpabiling bukas sa mga health center sa tanang higayon pinaagi sa pagbutang ug igong personahe niini.

“Ato gyod nang i-decongest ang atong hospital, kinahanglan ang mga pasyente dili na mo-landing sa hospital, kinahanglang diha na lang sa mga health center,”suma ni Alix.

Ang konsehal nga maoy chairman sa Committee on Health and Hospital Services sa City Council niingon nga padayon na niyang gitun-an ang maong lakang.

Alang kang Alix mas mominos na unya ang mga pasyente nga malandig sa Cebu City Medical Center kun CCMC kung makaabag niini ang mga health center sa siyudad.

Kini tungod kay adto na man unya sa mga health center modangop ang mga nanginahanglan ug dinaliang pagtagad sa mga mananambal.

“Mao gyod nay akong i-encourage unya nga ang mga ginagmay lang nga balatian adto lang gyod kutob sa mga health center.”dugang pasabot sa konsehal.

Lakip sa plano ni Alix mao ang pagpaanak sa mga nagsabak nga anha na lang usab himoon sa mga health center gawas niadtong nanginahanglan  og operasyon.

Sumala pa sa konsehal nga sa ingon niini nga paagi, maminusan na usab unya ang panaghuot sa mga manganak diha sa  CCMC.

Giangkon hinoon sa konsehal nga nanginahanglan og igong gahin ang iyang plano, ilabina sa pagpalit sa mga tambal ug kahimanan.

Apan masaligon si Alix nga sa hinay-hinay nga paagi, mahatagan ra  og katumanan ang iyang plano sa mga health center diha sa kabarangayan.