Gipatay sa sakop sa Bloods

Patay on the spot ang usa ka batan-on human kini pusila sa usa ka sakop sa Bloods didto sa Brgy. Pajo dakbayan sa Lapulapu kagahapon sa kaadlawon.

Ang biktima mao si Ronnel Soronio, 19, ulitawo ug residente sa Sitio Mustang, Barangay Pusok dakbayan sa Lapulapu.

Base sa pasiunang imbestigasyon ni PO3 Frederick Eslit sa homicide section sa kapolisan sa Lapulapu nasayran nga si Soronio kuyog sa iyang mga barkada mipalit og pan sa usa ka bakery sa New Paradise,  Pajo ug sa pagtabok niini sa dalan kilid na sa Gaisano Mactan usa ka tawo ang kalit lang kini nga namusil kanila.

Sa maong pagpamusil  si Soronio naigo sa iyang agtang hinungdan nga patay kini on the spot sa iyang nahimutangan.

Usa sa kauban ni Soronio miila sa suspetsado nga si Ronnie Espina, 18, nga nagpuyo sa New Paradise,Pajo dakbayan sa Lapulapu ug usa ka miyembro sa Bloods.

Nasuta usab sa kapolisan nga aduna nay daan panagsungi sa duha sa milabay’ng mga adlaw ug posibleng dumot ang motibo sa maong pagpamusil.