CAIDSOTF gipasidunggan ni Rep. Cuenco

Gihatagan og award ni Kongresista Antonio “Tony” Cuenco ang pangulo sa City Anti Illegal Drugs Special Operation Task Force ug ang mga sakop sa Criminal Investigation and Intelligence Branch (CIIB) kagahapon sa buntag tungod sa malampuson nilang pagdakop sa usa ka DJ sa inilang diskohan sa dakbayan sa Sugbu nga namaligya og Ecstasy niadtong Oktubre 27 diha sa Banilad.

 Ang task force commander sa CAIDSOTF Supt. Pablo Labra II  ug  Insp. George Ylanan, hepe sa CIIB maoy nakadawat sa maong pasidungog.

Ang gipanghatagan usab og award agig pasidungog mao sila si  SPO1 Filomeno Mendaros, PO3 Cesar Pandong, PO2 Benigno Andrew Ilagan, PO2 Helario Coderos, PO1 Albert Luardo, PO1 Carlo Roy Veloso ug PO1 Ruben Quita.

Kahinumduman ang maong mga polis malampusong misikop sa usa ka inilang pusher og Ecstasy nga si Mon Angelo  Congmon nga mas naila sa pangan nga “DJ Mon” human motunol og ecstasy balor usa ka libo sa gipahigayong buy bust operation diha sa Banilad.

Si Cuenco nipadayag nga dako kaayo niyang pasalamat sa mga nakasikop nga mga polis sa nagpayuhot sa maong illegal nga drugas kini tungod kay nagpakita kini nga ang problema sa drugas dinhi sa Sugbu mikunhod gyud subay ning subsob nga pagpanakop sa kapulisan.

Giangkon usab ni Ylanan nga lisud gyud kaayong dakpon ang mga namaligya og Ecstasy tungod sa kakuwang og impormasyon nga ilang madawat kay gihulagway sa kapolisan nga usa ka “high-end drugs” kumpara sa namaligya og shabu ug Nubain.

Samtang si Konsehal Agustus Jun Pe ang tsirman sa Committee on drugs sa konseho nipadayag sa iyang pasalamat sa kapulisan ingon man ni   Cuenco kinsa walay hunong sa paghatag og suporta sa mga lokal government units.