Batan-ong Abu Sayyaf ipasikop sa korte

Ipadakop sa korte ang batan-ong gidudahang sakop sa Abu Sayyaf nga nasakmitan og mga eksplosibo samtang luwan sa barko paingong Manila nga mihapit dinhi sa Sugbu niadtong Septiyembre.

Kini human si Regional Trial Court Judge Rafael Yrastorza mimando sa pagkansel sa piyansa ni Jaynurin Ampuan alyas Noy nga lumad nga taga Zamboanga tungod sa kapakyas niya pagtunga sa hearing kagahapon.

Nasayran usab nga si Ampuan dili minor de edad sukwahi sa iyang gitug-an. Si Prosecutor Rodulph Carillo mipresentar sa korte og “certified true copy” nga live birth ni Ampuan gikan sa National Statistics Office nga nagmatuod nga natawo kini niadtong Hunyo 15, 1988.

Tungod sa maong NSO-authenticated birth certificate, si Ampuan 19-anyos, ug dili minor edad subay sa pangangkon niini ug sa iyang mga ginikanan.

Sa kapakyas ni Ampuan sa pagpakita kagahapon sa korte ug ang pagkadiskubre nga namakak kini maoy nakaaghat ni Yrastorza nga ikanselar ang piyansa niini nga P100,000 ug gimando ang dinaliang pagdakop niini.

Si Carillo nagkanayon nga mosang-at siya’g mosyon aron usbon ang pag-raffle sa kaso ngadto sa regular court tungod kay si Ampuan dili minor de edad, samtang ang sala ni Yrastorza usa ka family court diin anha paminawon ang mga kaso nga naglambigit sa pamilya, kabataan ug kababayen-an.

Ang korte nagkanayon nga si Ampuan hatagan gihapon og lima ka adlaw aron motubag kun pormal nang isang-at ang mosyon ni Carillo.

Sa hearing kagahapon, si Ampuan wala nay representasyon tungod kay ang iyang mga abogado dinhi sa Sugbu mi-withdraw.

Sa sayo pa, si Ampuan nagkanayon nga dili sila maka-afford sa serbiso sa mga abogado sa Sugbu ug maglisud sila sa pagpakig-estorya niini tungod kay dili sila makamao sa pinulungan sa mga Muslim.

Kahinumduman, si Ampuan nasikop sa mga tripulante sa Superferry 5 sa Pier 5 nga mihapit sa Sugbu samtang mopaingon kini sa Manila gikan sa Polloc Port sa Parang, Dinaig, Maguindanao tungod sa paghupot niini og 90RR recoilless rifle ug M79 sulod sa sako nga may sulod nga saging ug patatas nga luwan sa maong barko.

Gi-turnover si Ampuan sa Criminal Investigation and Detection Group (CIDG-7) ug gipasakaan og kaso.

Nakagawas si Ampuan sa bilanggoan human makapiyansa aron makapauli sa Zamboanga aron makasaulog sa Ramadan.