Housing sa Kapitolyo usisahon

Posibling moagi na usab sa lungag sa dagum ang laing proyekto sa probinsya sa Sugbu nga planong tukoron sa luna niini diha sa barangay Busay dinhi sa dakbayan.

Nasayran nga ang Kapitolyo mipirma na og Memorandum of Agreement  (MOA) tali sa MRO Development Corporation nga maoy motrabaho sa housing project.

Ang MRO giingong gipanag-iya sa ig-agaw ni Mayor Tomas Osmeña nga si kanhi gobernador Lito Osmeña.

Apan matud sa mayor nga dili niya igsapayan kun ang proyekto iya sa probinsya o ang construction sa iyang ig-agaw maoy motrabaho niini.

Ang mahinungdanon ni Mayor Osmeña nga dili kini makamugna og laing problema sa siyudad ilabi na sa drainage system.

Gani pipila ka housing project dinhi sa dakbayan ang gipahunong sa mayor hangtod nga kini nakombinsir sa maayong drainage system niini.

Nabalaka si Osmeña nga mosunod sa Maria Luisa Park ang tupad nga housing project nga trabahoon sa MRO, nga makahatag og problema sa drainage sa siyudad.

Sumala pa ni Osmeña nga ang Maria Luisa Park mihimo kaniadto og dam nga makalangay sa agas sa tubig pa-ingon sa ubos apan kini giingong nawagtang.

Gipasabot sa mayor nga gani nalakip ang barangay Mabolo ug Apas gawas sa Banilad nga kanunay makasinati og pagbaha tungod sa tubig gikan sa Maria Luisa Park.

Miingon si Osmeña nga kinahanglan una siyang makombinsir sa drainage plan sa proyekto sa Kapitolyo una kini mahatagan sa gikinahanglang mga permit.