Nagsag-ob gipatay

Patay dihadiha ang usa ka 41 anyos nga lalaki human pusila sa wala mailhing tawo samtang nagkabo og tubig kagahapon sa buntag pasado alas 11 diha sa barangay San Rafael lungsod sa Barili.

Gituuhan sa kapolisan nga giatngan nang daan ang biktima sa wala mailhing mamumuno nga mopauli gikan nagkabo og tubig.

Nagdala pa og kontenir nga puno sa tubig ang biktimang si Misael Arellano, ulitawo, apan dunay kapuyo ug residente sa nahisgutang barangay kinsa nakaangkon og pinusilan sa nawong ug tulo sa kalawasan niini nga maoy nakaingon sa iyang hinanaling kamatayon.

Si SPO4 Andres Alpas, deputy officer sa Barili Police Station mitug-an sa Banat News nga mingaw ang nahitaboan dihang gipusil ang biktima.

Matud ni Alpas ang gikuhaan og tubig sa biktima dunay balay apan layo ug ang iyang agian nga dalan awaaw kaayo diin kalubihan ang kasagaran niini.

Ang biktima dugay nga nabantayan sa mga residente nga siya gipusil sa wala mailhing mamumuno tungod kay mingaw ang maong dapit.

Nagtuo si Alpas nga revolver ang gigamit pagpusil sa mamumuno ngadto sa biktima kay wala silay nakuhang kabhang sa crime scene.

Giangkon ni Alpas atol ning pagkutlo sa balita nga blangko pa sila kung si kinsa ang responsabli sa pagpusil patay sa biktima sanglit sa ilang gihimong pakisusi usa lang kini ka mangingisda sa maong dapit ug walay gikakontra ug labaw pang walay gikaatraso ning pipila ka adlaw nga nilabay.

Hinuon matud pang Alpas nga padayon karun ang ilang pakisusi sa kremin aron ilang mailhan ang responsabli niini.