Nadsu namuyboy sa ubang  transport groups

Daw namuyboy ang Nagkahiusang Drayber sa Sugbu (NADSU) ngadto sa mga kauban niining transport group nga mipadayag nga dili mosalmot sa gilaraw niining transport strike nga himuon karong mosunod nga mga adlaw.

Gibutyag ni Rex Tedalgo, provincial coordinator sa NADSU sa dihang nahinabi sa Banat News nga naanad na sila sa kanunay nga walay kooperasyon gikan sa ilang mga kaubang transport group sa mga kawsa nga ilang himuon pagpakigbatok ning padayong pagsaka sa presyo sa produktong petrolyo.

Apan ang gikahimangod lang ni Tedalgo nga apil sa makabenepisyo ang tanang sektor sa transportasiyon sa higayon nga magmalamposon ang mga kalihukan nga ilang himuon.

Apan bisan pa niini giinsister ni Tedalgo nga ipadayon gihapon sa NADSU ang ilang nahunahunaan nga paglusad og strike sa katapusan og sa unang semana  sa Disyembre.

Hinuon pagkakaron gisabotsabotan pa sa Nadsu ug sa sektor sa pamuo ang AMA- Sugbu KMU kun lapad nga protesta ba ang ilang himuon o transport strike.

Gipasabot ni Tedalgo nga alang sa tibuok sektor sa transportasyon ingon man sa sektor sa pamuo kining nahunahunaan nilang lakang nga maoy naapeke karon og maayo niining padayong pagsaka sa presyo sa produktong petrolyo didto sa world market.

Giklaro sa NADSU nga dili sila modemanda og dugang usbaw sa pletihan kun dili pangayoon lang nila sa Land Transportation  Franchising and Regulatory Board (LTFRB-7) nga ipatuman ang uniformity kon patas nga gi-aprobahan nga minimum nga plitihan didto sa Manila nga tag P7.50.

Upat ka mga dagkong mga isyu ang idemanda sa NADSU sa ilang ilusad unya nga welga ug kini mao ang pag-awhag sa gobyerno nga ipatuman ang rollback sa presyo sa produktong petrolyo nga tag P10  matag litro, pagbasura sa oil deregulation law ingon man ang pagpatuman sa P125  across the board wage increase sa mga mamumuo lukop nasud.