Usa ka inilang pusher sa sitio Capitoy sa barangay Punta Ingano sa dakbayan sa Lapulapu ang nadakpan sa kapolisan sa buy bust operation kinsa nasakmitan og 9 ka pakete nga shabu ug mga kahimanan sa paggamit.
Si PO3 Joseph Damasco nga gikahinabi sa Banat News miila sa suspetsado mao si Glenn Dehayco, 25, ug lumolupyo sa maong dapit.
Matud pa ni PO3 Damasco nga dugang nasakmit gikan sa suspetsado mao ang P1,400 nga salapi, ug 3110 nga Nokia cellphone nga ilang gituohang maoy gigamit nga communication sa ilegal niining negosyo.
Dugang pa niya ang team nga sila si PO3 Rodino Amistad ug mga kauban nagmalampuson sa pagdakop dihang usa ka polis ang nakapalit og shabu gikan sa suspek.
Laing pusher og shabu ang nakaikyas dihang gidakop sa buy bust operation sa Kalawisan sa mao gihapong dakbayan niadtong miaging adlaw.
Ang nakaikyas mao si Jesus Gingoyon, hingkod ang panuigon, ulitawo nga nagpuyo sa sitio Timpolok, barangay Babag sa maong dakbayan.