SKF, ABC election andam

Gitakda na ang piniliay alang sa Sangguniang Kabataan Federation (SKF_ ingon man sa Association of Barangay Council (ABC) sa siyudad sa Sugbu.

Kini maoy gipahibalo ni DILG Cebu City Director Patricio Gabuya, human usab masayod nga andam na ang kapunungan sa kabatan-unan sa dakbayan alang sa maong eleksyon.

Matud ni Gabuya nga ang piniliay sa SKF sa siyudad ipahigayon karong Disyembre 2, diha sa Ecotech Center.

Miingon si Gabuya nga siya gipahibalo na ni outgoing SKF president Glena Bontuyan nga duna nay pundo ang ilang kapunungan alang sa nahisgutang kalihukan.

Nasayran nga ang bag-ong napili nga mga opisyal sa SK sa dakbayan, dungan nga mulingkod sa napiling mga barangay official sa katungdanan karong Nobiyembre 30.

Human niini gipadayag ni Gabuya nga mupaubos gilayon og training-seminar ang mga sakop sa SK sa dili pa ang piniliay sa SKF.

Sumala ni Gabuya nga mahinungdanon ang SKF election tungod kay ang mapiling presidente niini maoy molingkod sa City Council isip ex-officio member.

Sa pikas bahin, gipahibawo usab ni Gabuya nga ang eleksyon sa ABC himoon sud sa usa ka buwan human makalingkod ang mga napiling opisyal sa kabarangayan.

Sama sa SKF president ang mapili usab nga ABC president, mao usab ang mulingkod sa konseho sa dakbayan isip ex-officio member.

Kini nagpasabot nga sila mo-function usab sa mga gimbuhaton nga gihimo sa mga konsehal sa dakbayan.

Wala pa hinuoy kisaw kung kinsa sa mga SK chairman sa kabarangayan sa dakbayan ang interesado sa pagka-presidente sa SKF.

Apan sa habig sa ABC pipila na ka pangalan ang nitumaw ug nipadayag og interes nga muhupot sa nahisgutang katungdanan.

Lakip na niini sila si Busay barangay captain Yodi Sanchez, Pahina Central barangay captain, Bebs Andales ug si Lahug barangay captain Mary Ann delos Santos.