Norwegian way bayad sa giinom gidakop

Usa ka Norwegian national  gidakop sa kapolisan human  gireklamo nga wala mobayad sa gi-order niining ilimnon sa usa ka bar sa Pusok dakbayan sa Lapulapu.

Ang maong langyaw giila nga mao si Ruben Gunnar Kirkhorn, 60,   kinsa temporaryong nagpuyo sa usa ka pension house sa Mactan sa maong dakbayan.

Si PO2 Christian Torres nga gikahinabi sa Banat News miingon nga mokabat sa P2,000 ang gi-order nga pagkaon ug ilimnon sa maong langyaw apan nagdumili kini sa pagbayad.

Dugang pa niya nga nangayo og panabang ang tagdumala sa maong establisamento ngadto kanila nga maoy hinungdan sa ilang pagtubag sa maong alarma.

Matud pa ni PO2 Torres nga makadaghan na sila makadawat og susamang reklamo nga gilambigitan sa maong langyaw nga maoy nakaaghat kanila sa pagpasaka na lamang og kasong estafa.

Ang embassy sa Norway nga ilang gipahibalo sa dili maayong gipakitang kinaiya sa maong langyaw ang nagpaabot usab nga ilang kapasakaan og kaso isip mao unya ang makapalig-on sa deportation proceedings niini.