Pintor mikirig

Dali nga gidala sa Vicente Sotto Memorial Medical Center sa dakbayan sa Sugbu ang usa ka pintor kinsa  nakuryentehan sa live wire sa Mactan Electric Company (MECO) kagahapon sa buntag sa  Poblacion, dakbayan sa Lapulapu.

Si PO3 Joseph Damasco miila sa biktima nga  si Ruben Belonias, 43 anyos, minyo, nagpuyo sa dalan Mangubat, Poblacion sa maong dakbayan.

Matud pa ni PO3 Damasco nga nagtungtong sa damba nga nahimutang sa ikatulong andana sa gipintalan nga panimalay ang biktima dihang kalit lang nga nasaghid sa livewire sa Meco.

Natingala ang mga kaubang trabahante sa biktima tungod kay kalit lamang kining mikisikisi sa kasakit dihang mipilit sa live nga kurente.

Dugang pa niya nga natagak ang biktima ngadto sa ubos ug nawad-an kini sa panimuot dihang gitabang sa kauban sa trabaho ug gidala sa Vicente Sotto Memorial District  Hospital sa dakbayan sa Sugbu.

Ang biktima kinsa padayon pa nga gitambalan sa mga doktor sa maong tambalanan   luwas na sa kuyaw nga kahimtang.