Honorarium sa titser ‘gitulisan’ og P1 mil

Mga maestra ug poll clerks kinsa miserbisyo sa milabay'ng eleksiyon sa barangay ang nangasagmuyo tungod kay ang ilang honorarium gikaltasan gikan sa P2,000 ngadto sa P1,000.

Si Talisay City School Division Superintendent, Carmelita Dulangon mikompirma kagahapon sa pakighinabi niini sa Banat News nga wala malipay ang mga magtutudlo ug poll tellers kinsa miserbisyo sa nahisgutang eleksiyon tungod kay naglaom sila nga P2,000 ang ilang madawat nga honorarium nga maoy gibutyag sa Comelec ngadto kanila sulod sa duha ka adlaw nga serbisyo.

Ug ang mga naghupot usab sa Sangguniang Kabataan gawas sa barangay hatagan og P500 nga dugang honorarium.

Matud ni Dulangon nga si Corazon Moran, Comelec Officer sa Talisay ang mipahibawo ngadto sa mga magtutudlo kabahin sa P2,000 nga honorarium nga ilang madawat ug gani gibuhatan na kini og payroll.

Apan niining bag-o lang giusab nila ang payroll sa ilang pagkahibawo nga P1,000 lang ang madawat nga honorarium.

Si Moran ni Dulangon pa mipasabot ngadto kanila nga ang maong budget mao lang ang gihatag kanila sa Department of Budget and Management (DBM).