Batan-on ‘bun-og sa hazing

Usa ka inahan ang midangop sa Minglanilla Police Station human niya madiskubrehing biktima sa hazing sa fraternity ang iyang anak ug duha pa ka mga silingan niini diha sa usa ka hilit nga dapit sa barangay Pardo niadtong Nobiyembre 2 sa kaadlawon.

Si PO1 Edward Keith Barameda, desk officer sa Minglanilla Police Station sa pakighinabi sa Banat News mitug-an nga midangop sa ilang buhatan ang usa ka ginang ug mitug-an nga ang iyang anak nga si Bonin Villondo, 19, taga sitio Akoy sa barangay Vito nakaangkon og daghang lagom agi sa bun-og sa duha ka bitiis niini.

Gitumbok nga mi-recruit kanila mao ang ilang silingan nga giilang si Joseph Pacatang, 21, nga gikatahong sakop sa Alpha Kappa Rho Fraternity kinsa gipangita sa kapolisan human sa pagsumbong apan wala na diha sa ilang balay.

Sumala pang Barameda, ang inahan ni Bonin nahibulong sa anak niadtong Nobiyembre 4 nga luya kaayo ug naghigda nalang diha sa iyang katulganan ug nagmagahi kini sa pagtug-an sa gibati niini.

“Adtong November 4 nahibulong naman ang inahan ani ni Bonin kay naglubog nalang man sa higdaanan unya gitakigan ug luya na kaayo,” asoy pang Barameda.

Wala magdugay sa tantong pangumbinsir sa inahan mitug-an ra si Bonin nga nisulod siya sa fraternity sa Akrho uban sa tulo pa nila ka mga silingan nga naila lang sa ngalan nga Antoy, 21, ug Christian, 21, ug si Pacatang maoy mi-recruit kanila.

Sumala pang Barameda base sa gitug-an sa tulo gibunalan sila og  70 ka higayon sa ilang mga bitiis ginamit ang paddle ug gisagpa-sagpa sa mga miyembro.

Diha-diha daling gidala sa Minglanilla District Hospital si Bonin ug gipatambalan samtang gitug-an sa inahan ang insidente sa kapolisan.

Apan si Barameda nagkanayon nga nagduha-duha og tug-an sa tanang detalye sa insidente si Bonin ingon man ang duha niini ka mga kauban.

Gipaabot nalang sa kapolisan ang pormal nga pagsang-at og kaso sa inahan batok kang Pacatang sanglit hangtud kagahapon sukad nga na-blotter ang insidente wala na mobalik ang inahan ni Bonin sa ilang buhatan.

Nagduda si Barameda nga posibleng nabalaka ang inahan sa seguridad sa iyang anak, ug dako usab ang ilang pagtuong posibleng dili lang ang tulo maoy gi-initiate niadtong higayuna.