Lantay operators sa Carbon i-regulate

I-regulate na ang mga Lantay Operators diha sa Carbon Public Market nga gikatahong pinugsanay nga mopaabang ngadto sa mga manindahay.

Kini human aprubahi ni Mayor Tomas Osmeña ang rekomindasyon ni City Market Administrator Racquel Arce.

Lakip sa girekomindar ni Arce mao ang estriktong pagpatuman sa 6:00pm-6:00am policy diha sa Carbon Complex.

Kadtong mga lantay nga dili mahipos human sa gitakdang oras, giingong kompiskahon ug panag-iyahon na sa City Government.

Dugang niini mao ang pag-distribute lang sa mga lantay ngadto sa nanginahanglan niini ug dili pinugsanay ang pagpaabang.

Labaw sa tanan, mao ang pagpabayad og buhis sa mga operator sa ilang Lantay Renting Business ngadto sa kagamhanan sa dakbayan.

Ang rekomendasyon ni Arce iyang nakab-ot human usab ipatawag niini kagahapong adlawa ang mga lantay operator diha sa Carbon.

Sa 18 ka operator nga gipatawag ni Arce, 9 lang niini ang nitunga alang sa gihimong imbistigasyon ni Arce.

Nasuta sa City Market Administrator nga way bisan usa sa mga lantay operator ang nibayad og buhis sa City Government.

Nakompirmar usab ni Arce nga dunay mga operator nga mupugos pagpaabang sa ilang lantay ngadto sa mga   vendors.

Kini maoy hinungdan nga wala na kaagwanta ang ubang manindahay ug nireklamo sa paagi sa mga lantay operator.

Nasayran nga ang mga operator mupaabang sa ilang mga lantay ngadto sa mga vendors sa tag P10 matag adlaw.