Gasolinahan gitulis sa duha

Duha ka mga wala mailhing lalaki ang mitulis sa usa ka gasoline station ug gihapsan pa og armas ang guwardiya niini una pa kuhaa ang halin sa maong gasolinahan nga nahimutang sa dalan L.Tudtud ug M.J Cuenco Ave.sa barangay Mabolo kagahapon sa kaadlawon.

Si  Mabolo policewoman PO2 Ian Carl Samson mitug-an sa Banat News nga ang duha ka wala mailhing tulisan nagsakay og itom nga motorsiklo, usa kanila armado og pistola ang mihapos sa puloan niini sa nawong sa guwardiyang si Laureto Pizzane, 23, sakop sa Archangel Security Agency kinsa maoy bantay sa Caltex gas station nga gipanag-iya ni Grace Yolada.

Matud pang Samson, human mahagba paghapos sa armas diha sa nawong si Pizzane miadto dayon ang maong tulisan sa kaherang si Sheryl Sencio ug mimando sa pag-abli sa drawer apan  nagmagahi pa ang kahera hinungdan nga nagpabuto ang tulisan.

Sa kahadlok niini wala nalang siya molihok dihang gikuha sa tulisan ang halin nga P2 mil diha sa maong drawer samtang daling milakaw ang tulisan balik sa kaubang nagpaabot sa motor ug daling miikyas sa dapit.

Gikatahong dunay armas niadtong tungura si Pizzane apan iya kining gibilin ngadto sa iyang bag nga layo ra sa dapit diin siya gihapsan sa maong tulisan.

Daling miresponde ang mga sakop sa Mabolo Police Station pinanguluhan ni SPO4 Raul Magdadaro apan wala na diha ang mga nanulis ug narekober nila ang duha ka basiyo sa .45 kalibreng bala.