Kon. Alcoseba pabor sa balaodnon

Pabor si Cebu City Councilor Yayoy Alcoseba sa balaodnon nga maghimong subject sa road traffic safety rules and signs sa grade six ug fourth year.

Ang konsehal nga maoy chairman sa Committee on Traffic Management sa City Council nagkanayon nga usa ka maayong lakang ang nahisgutang sugyot.

Si Senador Miriam Defensor-Santiago maoy nipalabang sa Senate Bill 1688 nga nagtinguhang matudlo ang road traffic signs and safety ngadto sa mga tinun-an.

Kini tungod kay ang road-traffic accidents gikatahong maoy “biggest killers” sa nasud diin ang kabataan maoy giingong kasagaran nga biktima.

Matud ni konsehal Alcoseba nga mas maayong bata pa tudloan na sa road safety aron motuhop sa panumduman niini ang disiplina.

“Lisod kaayo og dagko na tudloan nimo ilabina sa natad sa trapiko kay ipalapos lang sa pikas dunggan,” suma sa konsehal.

“Panid-i ra gud nang mga tawo nga molabang diha sa Robinsons paingon sa Vicente Sotto hospital, naa man gyud nay skywalk diha, pero sa karsada gyud gihapon molabang ang mga tawo, pahunongon pang sakyanan inig agi nila, unya moingon dayon nga way gamit ang mga skywalk sa siyudad,” dugang pamahayag ni Alcoseba.

Sama kang Senador Santiago nagtuo usab ang konsehal nga angayang mamahimong “way of life” sa nasud ang road courtesy ug kinahanglang masayran sa tanang katawhan.

Sa pikas bahin, niingon si Alcoseba nga mas maayo gani nga ipaubos usab sa hustong training ang mga driver, sa dili pa kini tugotang momaneho og sakyanan diha sa karsada.

Kini tungod kay giingong dili malimod nga dunay mga drayber nga way mga disiplina, ilabina niadtong mga nagmaneho og pampublikong mga sakyanan.

Nasayran sa  Banat News nga sa malamboong mga nasud sama sa Japan, gikinahanglan pa sa gustong mag-driver nga mo-enroll sa formal driving school aron makakuha og lisensiya.

Gawas niini, ang mga bata sa malamboong mga nasud giingong gitudloan usab kung unsa ang angayang buhaton nga malikayan ang mga aksidente sa kadalanan.