Mga sakayan gipasidan-an sa Pagasa

Gipasidan-an sa mga tinugyanan sa panahon ang mga sakayan sa dagat sa pagbantay ning mga panahona kay matag karon ug unya bisan walay bagyo mokalit lang ang unos nga maoy makapadisgrasya  sa mga biyahidor sa kadagatan.

Si Alice Canasa, weather forecaster sa Philippine Atmospheric Geophysical and Astronomical Services Administration (PAGASA) mihimo ning maong pasidaan gumikan sa trahedya sa kadagatan sa isla sa Camotes diin namatyan og tulo  samtang may missing nga duha niadtong Miyerkules sa hapon.

Gipasabot ni Canasa nga ang unos mahitabo kini una mobundak ang kusog nga ulan nga pagapasiunhan sa lipak ug kilat.

Matud pa niya nga ang kabugnaw sa ibabaw dala sa talibundak  nga uwan, ubanan gayud kinig hangin nga mugna sa dalogdog ug kilat.

Ang maong unos kalit kaayo nga mohapak ug dili usab kaayo molanat og dugay apan ang impact niini makabukal og kalit sa dagat, matud pa ni Canasa.

Mao kini iyang panahom niadtong bangka nga MB Anton nga dihang nahiabot na kini sa duol na sa baybayon sa barangay Kawit, lungsod sa Pilar, isla sa Camotes niadtong Miyerkoles sa hapon, natikyaob sa  dihang wala makabantay ang timonel niini sa pagsugat unta  sa mga higentang bawod nga dala sa unos.

Miingon si Canasa nga ang gikinahanglan unta sa mga sakyanan bisan barko sa panahong modasmag ang mga dagkong bawod, kinahanglang ipaatubang ang simod sa sakyanan sa bawod aron nga makapanimbang gihapon kini samtang motabas sa bawod.

Ang pagkatikyaob sa MB Canton nahimo kini dihang nawad-an sa panimbang ang maong sakyanan kay malagmit wala kini mosugat sa mga bawod.

Ang ubang tigpaniid nagkanayon nga kun misungasong o gisugat pa sa maong sakayan ang dagkong bawod, mahimong malunod kini kay sabwan sa dagat ang luwang, apan dili motikyaob.

Apan may dakong kalagmitang nawad-an kinig umoy sa pagsungasong sa bawod ug maoy hinungdan nga  dali ra kaayong nasarasay dihang gidasmagan ug gidabodabohan paghapak sa dagkong mga bawod.

Busa alang kang Canasa nga mao kini bantayanan kaayo sa mga   sakayanon nga kun mokalit lang og kisdom ang langit unya may mga kilat, lipak ug dawogdog , timan-an nga inigbugnaw sa palibot, mosunod dayon ang kalit kaayong kusog nga hangin dala ang pino kaayong uwan ug mao   ang unos una mobundak ang kusog nga uwan.