Drayber gipatay sa iyang gikaaway

Patay ang usa ka drayber sa pasaheroan human kini pusila duha ka higayon sa  tawong iyang gikaaway kaniadto samtang ang biktima naglakaw pauli sa ilang balay diha sa may dalan Saint Jude sa barangay Mabolo niadtong milabay’ng gabii.

Ang biktima giilang si Joel Batiller, 37, residente sa sitio Magtalisay sa nahisgutang barangay samtang walay swerte ang suspek sanglit nadakpan kini dayon sa mirespondeng mga sakop sa Mabolo police station.

Ang suspek kinsa gikatakdang pasakaan karong adlawa og kaso giilang si Eugene Taripe, 29, usa ka fruit vendor nga giingong dugay ng may pagdumot sa biktima.

Sa imbestigasyon sa Homicide Section pinanguluhan ni SPO4 Alex Dacua nasuta nga gikan pa ang biktima sa birthday party sa iyang higala ug padulong na pauli sa ila dihang gibabagan sa suspek diha sa nahisgutang dapit.

Ang biktima wala makabantay dihang giduol ug kalit dayong gipusil duha ka higayon diha sa ulo ginamit ang wala matinong kalibre sa armas hinungdan sa hinanali niining kamatayon.

Ang suspek dali usab nga misuot-suot sa kabalayan apan ang mga residente mitug-an sa grupo nila ni SPO1 William Tabotabo sa Mabolo Police Station kinsa maoy miresponde diin makit-an si Taripe.

Si Taripe nadakpan ug gidala sa Mabolo Police Station alang sa imbestigasyon.