10-anyos nga lalaki naanod sa baha

Usa ka 10 anyos nga batang lalaki  naanod sa baha samtang nag-inusara na lang kining naligo sa sapa human mobiya ang iyang upat ka kauban sa miaging hapon diha sa barangay Cambuhawe, lungsod sa Balamban.

Dali ra hinuong nakit-an ang patay’ng lawas sa biktimang si Alexis Bago Santos nga taga sitio Lacdon sa susamang barangay human masangit ang iyang lawas sa kasagbutan diha sa maong sapa.

Matud pang PO1 Arman Enriquez sa Balamban Police Station nga nahinabi sa Banat News miingon nga dunay laing upat ka kauban ang biktima nga nangaligo sa sapa niadtong higayona.

Gikatahong namauli na ang iyang upat ka kauban apan ang biktima nagpabilin gihapon ug nagpadayon sa iyang pagkaligo sa sapa hangtod nga mibundak ang kusog kaayong ulan ug dugay kaayong mituang  nga maoy nakamugna og pagbaha gikan sa bukid.

Matud ni PO1 Enriquez dunay residente sa dapit nga nakakita  sa kalit lang pagkahanaw sa  biktima diha sa gikaligoan hinungdan gipahigayon gilayon ang search and rescue operation apan didto ra sa unahan siya makit-i human masangit ang lawas sa mga sagbot daplin sa sapa.

Nagtuo si Enriquez posibling nabunal sa culbert ang biktima sa dihang mibul-og ang kusog kaayong baha nga maoy hinungdan nga naanod siya.