Hapsay sab sa Talisay City

Gikan sa pagpahigayon sa eleksiyon sa barangay ug Sangguniang Kabataan ang kapolisan wala pa makapahuway tungod kay padayon pa gihapon ang ilang operasyon sa paghinumdom sa kalag-kalag.

Si Police Superintendent Romeo Perigo hepe sa kapolisan sa dakbayan sa Talisay mibutyag sa Banat News kagahapon nga full force gihapon sila karon tungod sa nahisgutang mga kasaulogan.

Hugot ang siguridad sa lima ka sam-ang sa siyudad diin 24 oras ang mga polis nga magbantay sa mga sam-ang sugod kagahapon ug ugmang adlawa sa alas 8:00 sa buntag pa i-pull-out sa ilang pwesto ang mga polis nga nakadestino sa mga sam-ang.

Ang kapolisan gibahin ngadto sa duha ka grupo diin ang unang grupo mo-duty sulod sa 24 oras ug ang sunod nga grupo nga mopuli mo-duty usab kini sulod sa 24 oras aron makapahuway usab ang unang grupo.

Kagahapon sa alas 5:00 sa buntag ang mga traffic enforcers gipadala na sa mga lugar aron magmando sa trapiko.

Si Perigo midungag nga kagahapon sa buntag wala silay nasikop nga nakalapas sa ordinansa sa siyudad kinsa nagdala og mga ilimnong makahubog, hinagiban ug nagsaba-saba sulod sa mga sementeryo nga makahatag og kahasol sa uban.