Kalag-kalag hapsay

Gikunsiderar sa kapolisan kagahapon nga malinawon ug hapsay ang pagpahigayon sa unang adlaw sa Todos Los Santos kung ang seguridad ug dagan sa trapiko maoy hisgutan.

Kini gumikan sa gatusang mga polis ug sundalo lakip na ang kapin 400 ka mga traffic enforcers nga gipakatap aron bantayan ang mga sam-ang sa dakbayan.

Apan bisan paman sa maong kalampusan, duna gihapoy nga ginagmay'ng reklamo sa habig sa mga tawo ilabi na sa mga vendors diha sa sulod sa mga sam-ang tungod sa kahigpit sa mga polis ug gipangkuha ang ilang mga kutsilyong gamiton sa ilang pagpaninda.

Dunay mga tindero og prutas ug pungko-pungko sa sam-ang sa Carreta ang mireklamo gumikan sa pagkuha sa mga polis ug mga sakop sa barangay intelligence network sa ilang kutsilyong gigamit sa pagpaninda.

Tungod niini si Sr. Supt. Patrocinio Comendador kinsa mibisita sa Carreta mimando sa iyang mga sakop nga dili kaayo estriktuhon ang mga tawo ilabi na sa mga nanindahay og prutas ug makaon diha sa mga sam-ang.

Kini dihang  iyang nakit-an nga alas 12 palang sa udto duna nay nakumpiskar nga gibana-banang 70 ka mga kutsilyo, lugit sa kandila ug pintal, sundang ug screw drivers diha sa lamesa sa mga polis.

Matud pang Comendador, isip usa ka polis angayang tan-awon una nila kung ang gamitan sa maong mga butang binuang o ba kaha para sa pangabuhian.

“Dapat flexible ba, individual decision naman na sa pamolis, kay unsaon man nimo na pag-negosyo kung wala kay kutsilyo, alang-alang man pud og ilang pang-uson ang mangga,” asoy pang Comendador.

Hinuon pipila sa maong mga hinagiban ang gipang-uli ra dayon human mamauli ang mga tag-iya. Ang Calamba security maoy may labing daghang mga nakumpiskar nga mga hinagiban ug sunod usab ang sa Queen City Garden Cemetery .

Sagad niini mga sundang, kutsilyo, guna, icepick, ug lugit, samtang dunay pipila usab nga nakuhang mga bino kini bisan paman sa pagdili niini pinaagi sa city ordinance.

Si Chief Supt. Ronald Roderos, direktor sa Police Regional Office 7 kinsa milibot sa mga dagkong sam-ang sa dakbayan nagkanayon kinahanglang kuhaon ang mga bino ug ubang ilimnong makahubog tungod kay kini maoy sagad nga hinungdan sa away.

“We have to confiscate the liquors to avoid untoward incidents inside the cemeteries,” sumala pang Roderos atol sa pagbisita niini sa  Queen City Garden.

Gisusi usab ni Roderos ang upat ka mga  security cameras nga gibutang diha sa  entrance gate sa Calamba, Carreta, Queen City Garden ug CEM Park nga mga sam-ang, kini gigamit aron makatabang sa pagbantay ug pagmonitor sa kalihukan sa mga tawo nga makit-an ug gikontrol sa diha sa buhatan sa  Police Regional Office-7 headquarters.