Giluba patay sa Tabunok

Patay ang usa ka wala mailhing lalaki human kini dunggaba niadtong Miyerkules sa hapon atol sa besperas sa adlaw sa mga Santos diha sa Sitio Neigborhood, Barangay Tabunok, dakbayan sa Talisay.

Ang suspetsado giila sa mga polis nga si Rafael Rabadon hingkod ang panuigon residente sa nahisgutang lugar kinsa daling miikyas human sa maong hitabo ug padayon pa kining gipangita sa mga polis.

Base sa imbestigasyon sa grupo ni  Insp. Leoncio Baliguat Jr. nga ang wala mailhing biktima mianha sa lugar nangita ni Marissa Rabadon nga paryente ni Rafael.

Si Rafael kinsa hubog   gikatahong hilig mangita og gubot diha sa ilang lugar sa walay igong rason midunggab ngadto sa biktima.

Ang biktima nakaangkon og samad dinunggaban sa tuong bahin  sa dughan ug  daling gidala sa Talisay District Hospital apan gideklarar kini sa doktor nga patay na nga naabot sa maong tambalanan.

Ang kapolisan napakyas sa ilang gipahigayong hot pursuit operation batok ni Rafael.

Si Baliguat sa pakighinabi niini sa Banat News kagahapon nagkanayon nga ang suspetsado gikataho usab kining mogamitay og ginadiling drugas ug kung ma-high kini mag-trip og away. Wala silay nakuhang dugang nga impormasyon sa hitabo tungod kay ang mga residente sa lugar walay ayuda ngadto sa mga polis.

Si Baliguat midungag nga wala silay nakuhang identity sa biktima kinsa ang patay'ng lawas naa karon sa St. Francis Funeral Homes sa dalan Natalio Bacalso niining dakbayan.

Ang kapolisan mipahigayon og follow-up nga imbestigasyon aron masuta ang motibo sa maong hitabo.