Nobiyembre bulan sa super typhoon

Ang mga tinugyanan sa panahon mipasidaan nga ang buwan sa  Nobiyembre maoy buwan nga bantayanan tungod kay kasagaran anhi mahitabo ang mga “super typhoon”.

Matud pa ni Alice Canasa, weather forecaster sa Philippine  Atmospheric Geophysical and Astronomical Services Administration (PAGASA) nga ang buwan sa Nobiyembre maoy panahon nga mopaubos na ang hangin sa mga bagyo nga morumbo sa nasud gumikan sa hangin nga amihan.

Gumikan niini kasagaran sa mapormang bagyo gikan sa kadagatan sa Pacifico, motugpa gyud sa yuta sa Pilipinas, lahi sa bagyo nga mamugna sa panahon sa tinghabagat nga usahay molapaw sa ibabaw ug mogawas  nga dili magbilin og kadaot.

Busa alang kang Canasa mas maayong mabinantayon ang matag usa  aron dili makalitan kun may kusog nga bagyong mahitabo sa nasud.

Dili usab kapugngan ang kusog nga uwan, pagdahili sa yuta ug mga dagkong baha bisan way bagyo ning buwan sa Nobiyembre.

Gibase sa  mga tinugyanan sa Pag-asa ang ilang panahom sa nahitabo sa milabay nga Nobiyembre 2006 diin may duha ka mga super typhoon ang miigo sa nasud.

Hinuon ang dapit sa Luzon mao ray gikusokuso sa bagyong Reming ug Queenie niadtong higayon diin nagbilin og ubay-ubay nga kinabuhing  nakalas ug kabtangang nadaot  nga mibalor og minilyon ka pesos.