2 ka brgy opisyal supak ni Radaza napilde

Duha ka barangay opisyal nga supak sa administrasyon ni Lapulapu City Mayor Arturo Radaza napilde sa mga bag-ong kandidato pagkabarangay kapitan sa barangay Basak ug Punta Engaño sa dakbayan sa Lapulapu atol sa milabay'ng eleksiyon.

Sa  Basak, gipilde ni  Lolit Berdin ang igsuon ni  kanhi kapitan Isabelito Darnayla nga si Fulvio “Obyong” Darnayla nga maoy iyang gipadagan human nga mapupos ang iyang termino ug  midagan usab kini isip konsehal diin siya ang numero unong konsehal sa  Basak.

Atol sa proklamasyon kagahapon sa kadlawon bugtong lamang si Isabelito Darnayla ang wala motunga sa pagproklamar sa mga sakop sa Barangay  Board of Canvasers  (BBOC).

Base sa kampo ni Darnayla nga duna gyud pagpanikas sa maong piniliay ilabi na nga si Berdin tawo ni  Radaza nga gituyo pagpadagan aron masolido na niini ang mga barangay nga pabor sa administrasyon ni Radaza.

Mao usab kini ang gibati ni kanhi   Kapitan  Angel Rodriguez sa  Punta Engaño human kini gipilde ni   Lourdes Bargamento Ibag atol sa maong bugnong lugaynon sa milabay'ng adlaw.

Si Ibag maoy gikatahong giparang sa administrasyon ni Radaza batok ni Rodriguez human kini mibiya sa kampo ni Radaza sa milabay nga mga bulan human wala matuman sa  mayor ang saad niini nga relocation site sa mga gi-demolish nga kabalayan sa mga residente sa  Punta Engaño.

Ang mga midagan sa pagka barangay kapitan sa Basak ug Punta Engaño pulos unang higayon nga misabak sa pagka-opisyal sa barangay ug nasayran sa Banat News nga sa 30 ka barangay sa dakbayan sa Lapulapu lakip na ang mga kaislahan ang mga manok ni Radaza usa lamang ang napilde niini ug kini mao ang  Kapitan sa Brgy. Pangan-an nga si Virgilio Inoc Casiao diin gipilde kini ni Climaco Tatoy Jr.