Way klase karong adlawa

Regular working day karong adlawa apan walay klase sa publikong mga tunghaan sa dakbayan sa Sugbu karon ug ugmang adlawa.

Kini maoy gipahibalo ni Cebu City Schools Division Superintendent Doctor Lorna Rances tungod usab sa gipahigayong Barangay ug SK elections kagahapon.

Matud ni Rances nga duna pay tiwason ang mga magtutudlo sa ilang pagserbisyo ug kini mao ang pag-uli sa resulta sa eleksyon ngadto sa Comelec.

Nagkanayon si Rances nga apeke na usab kun magklase pa ugmang adlawa tungod kay holiday na sa Huwebes ug  Biyernes.

“Duna pa man goy tiwasonon nga trabaho ang mga magtutudlo karon, unya ugma, mamauli na usab ang uban nga taga probinsya tungod sa kalag-kalag," sumala pa  ni Rances.

Tungod niini, nadugangan og laing usa ka semana ang bakasyon sa mga tinun-an ug sa ubang mga magtutudlo nga wala  makaserbisyo sa  miaging piniliay.

Apan giklaro sa City Schools Division Superintendent nga mopahigayon og make-up classes ang mga magtutudlo karong Nobyembre 10 ug 17.

Kini aron makumpleto ang gikinahanglang mga adlaw sa tuig tingklase ug dili usab maalkanse ang mga tinun-an sa angayan niining makat-onan.

Gitataw ni Rances nga kadtong mga magtutudlo nga wala moserbisyo sa nakalabay nga piniliay, duha ka adlaw ang himuon nilang make-up classes.

Samtang kadtong  miserbisyo sa niaging eleksyon usa lang ka adlaw ang ilang i-make-up ug kini himuon karong Nobyembre 10.

Nasayran usab sa Banat News nga susamang kamanduan ang giluwatan ni Cebu Provincial Schools Division Superintendent  Recaredo Borgonia.

Tungod niini, way klase usab karon ug ugma sa publikong mga tunghaan sa lalawigan, apan gikinahanglan gihapon niini ang make-up classes.