Flying voters mihasi sa Pasil

Gihamok sa mga flying voters ang piniliay sa barangay dinhi sa dakbayan sa Sugbu kagahapong adlawa kini human adunay mga tawo nga nakabotar bisan tua sa gawas sa nasud.

Si Konsehal Mario Bitang  kinsa midagan pagka-kapitan sa Barangay Pasil  mitug-an nga usa sa iyang supporters  mireklamo human sa iyang pag-adto sa presinto niini sa 2124A mga alas 9 sa buntag.

Si Bitang miklaro nga ang iyang supporter nga si Mario Bacalla  mireklamo sa chairman sa iyang presinto human  nasuta nga aduna nay laing mibotar sa iyang pangalan.

Hinuon iyang giklaro nga paglabay sa pipila ka oras naresolbar lang usab hinuon ang maong isyu ug gipabotar si Bacalla human makita sa original voters list nga susama lang kaniya og pangalan apan tua kini karon sa gawas sa nasud.

Sumala pa niini nga gi-note lang ang serial number sa maong botante ug gimarkahan na kini og flying voters ug dili na kini kwentahon pa.

Laing wala makabotar sa presinto 2131A mao si Danilo Flores.

Subay niini iyang giklaro nga wala siyay nakita nga pagmaniobra sa eleksiyon sa ilang barangay ug gani maayo ang turnout sa eleksiyon.

Samtang si Comelec Cebu City south district election supervisor Edwin Cadungog mipadayag nga hapsay ang pagbukas hangtod na sa pagtak-op sa pagbotar kagahapon.

Giklaro usab niini nga mga “political bluffing” lang sa mga politiko ang mga reports nga nakuha sa  media kini tungod kay sagad na kining mopahibalo nga adunay mga flying voters ug uban pang anomaliya.

Apan  iyang gitataw nga hangtod gitak-opan ang mga presinto walay mga reklamo nga nadawat sa iyang buhatan labot niining maong isyu.

Iyang giklaro nga nunot sa maong reports walay aksyon nga mahimo ang ilang buhatan sa pag-imbestigar niini ingon man ang pagsilot niadtong mga mipasangil.

Iyang gidugang nga kun adunay reklamo sa bisan unsang tikas sa eleksiyon andam silang mohimo og  aksyon kini kun adunay ensaktong mga ebidensiya nga magtumbok sa usa ka gipasanginlan.

Samtang sa iyang bahin si Cebu City north district election supervisor Marchel Sarno mipadayag nga mapasalamaton kaayo siya gumikan kay walay mga untoward incident  kagahapon.

Samtang ang kabahin sa flying voters matud pa niini walay mga kamatuoran ang report labi na sa gikatahong pinalitay sa mga botante.