Mitiyabaw si Letty Maribao ang apohan sa walo ka bulan nga bata nga namatay sa sakit nga dengue didto sa lungsod sa Ronda, Cebu human kini giingong giharas sa doktor nga maoy iyang gipasanginlan nga nagpabaya hinungdan nga namatay ang iyang apo nga si Mathew niadtong Septiyembre 27.
Ang abogado sa pamilyang Maribao nga si Atty. Czarem “Chad” Estella maoy nibutyag nga misumbong kaniya ang iyang kliyente kabahin sa gidudahang mga tawo niini nga nagmonitor ug nagsunod sunod sa iyang mga lakaw didto sa ilang lungsod.
Matud ni Estella niadtong miaging adlaw kalit lang gibabagan sa duha ka sakyanan ang iyang kliyente samtang gikan kini nga misimba.
Apan tungod kay nakamatikod kini nga posibleng dautan ang tuyo sa mga sakay niini ngadto kaniya walay duha duha nga midagan pahilayo si Maribao ug nidangop sa kapolisan.
Matud ni Estella nga dako ang posibilidad nga may kalambigitan ang maong panghitabo sa pagpasaka og kaso sa iyang kliyente batok kang Dra. Fe Villegas, tagdumala sa Villegas Medical Clinic sa lungsod sa Barili, Cebu.
Ang maong doktora gipasakaan og kasong administratiba sa pamilyang Maribao sa Professional Regulations Commission (PRC) tungod sa gihulagway nila nga pagpabaya sa doktora hinungdan sa kamatayon sa ilang walo pa ka bulan nga apo.
Subay sa reklamo nga giduso sa pamilyang Maribao sa PRC nagpabaya ang doktora sa iyang propesyon sama sa wala pagtug-an sa tinuoray’ng kahimtang sa bata dihang nalandig kini sa maong klinika nga gipatuo lang nga ordinaryong hilanat apan nadiskubrehan nga dengue kini dihang gidala na sa Vicente Sotto Memorial Medical Center (VSMMC) apan ulahi na tungod kay luya na og ubos na kaayo ang platelet sa bata hinungdan nga namatay.