Mga kawatan sikop

Unom ka gipasanginlang kawatan ang nadakpan lakip na menor de edad nga ilang kauban human sila maaktuhing nanghakot ug mikarga sa ilang mga kinawat sa usa ka gipakyaw nga multicab kagahapon sa buntag diha sa Sudlon, barangay Lahug.

Ang nangadakpan giilang sila si Harvey Sarabosing, 28, Josephus Salamanca, 21, Virgilio Arias, 29, Jun Carlos, 38, Chelito Ballesten,  23,  ug kinse anyos nga batang lalake, pulos mga taga barangay Lorega-San Miguel.

Ang mga suspek nadakpan atol sa ginukdanay sa kapolisan nga gilangkuban nila ni PO2 Roweno Gabutan, PO2 Jimmy Dumalag sa car 018 ug PO2 Dennis Hernandez ug PO1 Renato Noval,Jr. sa car 015 pulos mga sakop sa Mobile Patrol Group.

Ang unom gidala ngadto sa buhatan sa Theft and Robbery Section alang sa pagpasaka og kaso sa tag-iya sa balay nga si Alfred Cebedo kinsa miingon nga sa mga polis nalang sila mahibalong gikawatan ang ilang karaang balay.

Sumala pa lakip sa nangawagtang mao ang aircondition unit, usa ka refrigerator, mga jalousy casings nga aluminum ug uban pa, samtang narekober diha sa multicab mao ang glass table, sala set, tulo ka mga daan nang mga kama ug uban pa.

Si Ballesten nagkanayon nga mao kadto ang ikaduhang adlaw nga nanguha sila’g butang sa maong balay, apan ang mga tawo sa dapit nagkanayon ikatulong adlaw na nga dunay mga tawong nihakot sa mga butang sa balay ni Cebedo.

Si Ballesten mipadayag nga walay labot ang mga silingang nangadakpan tungod kay siya ra ug ang kinse anyos maoy nanguha didto apan nanguyog ang mga silingan human pasaliging hatagan og tagsa ka gatos kung makakuha og sakyanan.

Samtang ang drayber nga si Marcos Muñoz,50 nga taga Tisa miingon nga wala siya kahibalong kinawat ang gipangkarga sa iyang sakyanan tungod kay gipara ra siya ug gipakyaw og P400 sa  grupo.