Suspek sa pagpatay sa usa ka fruit vendor diha sa barangay Tisa ning dakbayan mitahan ngadto sa kapolisan sa dakbayan sa Bogo human sa lima ka adlaw nga pagtago-tago.
Ang nitahan giilang si Edmund Aballe, 32, lumad nga taga Bogo kinsa temporaryong nagpuyo diha sa sitio Magtinabangay sa barangay Tisa ning dakbayan.
Si Aballe maoy gitumbok nga midunggab patay kang Lorenzo Aliganga, 50, igsuon sa kapuyo ni Aballe nga si Antonieta.
Sa imbestigasyon ni SPO2 Jay Yballe sa Homicide Section sa Cebu City Police Office, ang biktima ug si Antonieta gikatahong nag-estoryahanay diha sa balay sa biktima dihang naabot ang suspek ug walay daghang pangutana gidunggab ang biktima makausa diha sa ibabaw'ng bahin sa walang dughan.
Ang suspek ug ang kapuyo niini daling miikyas palayo sa lugar samtang gidala sa asawa si Aballe ngadto sa Cebu City Medical Center apan gideklarar kining dead on arrival.
Si PO3 Allan Dosdos ang imbestigador nga gitahanan kang Aballe sa Bogo City Police Station mitug-an sa Banat News nga gikumbinsir sa iyang amahan ug sa barangay Kapitan sa Malingin nga si Manuel Alburo ang suspek sa pagtahan.
Si Aballe mitahan alas 10 pasado na sa buntag human kini moabot gikan sa dakbayan sa Sugbu kagahapon. Gikatahong diha ra kini magtago sa barangay Basak sa dakbayan sa Sugbu human sa insidente ug nahadlok maong siya wala motahan.