Usa sa duha ka tulisan gisikop sa sikyu

Nasikop sa security guard ang usa sa duha ka tulisan nga mitulis sa pasahero sa PUJ sa dalan Ayala access road sa  Hipodromo dakbayan sa Sugbu kagahapon sa kaadlawon.

Ang nakadakop mao si Noel Monterde, 25, residente sa Maguikay, Mandaue ubos sa Maya Security Agency nga nadestino sa SM City Cebu.

Samtang ang biktima mao si Shiela Baldoza, 18, dalaga ug residente sa sitio San Miguel,  Apas, ning dakbayan.

Matud pa ni Monterde samtang luwan siya sa usa ka PUJ gikan sa dakbayan sa Mandaue pag-abot sa Hipodromo duha ka tulisan ang mideklarar nga tulis samtang nagtion kini og armas ngadto ni Baldoza.

Sa dihang iyang nasuta nga walay dalang armas ang usa iya kining gipiit samtang ang kauban sa tulisan milayat sa maong sakyanan.

Nakuha ni Monterde ang cellphone ni Baldoza ug dali kini nga gidala sa buhatan sa  Theft and  Robbery Section ang suspetsado.

Atol sa imbestigasyon sa TRS nasuta nga ang  nadakpan ni Monterde mao si Rocky Quimay, 21, ulitawo nga nagpuyo sa  Carreta ning  dakbayan  ug ang nakaikyas nga armado sa kalibre .38 mao si Porting Sanchez, lumad sa lungsod sa Argao, Cebu.

Si Quimay naputos sa bun-og sa kalawasan human kini kulataha sa mga estambay sa maong dapit ug anaa sa detention cell sa kapolisan sa CCPO samtang gihikay na ang pagpasaka og kaso niini.

Si Monterde gidayeg sa TRS tungod sa iyang kaisog pagdakop kang Quimay.