Bonus sa mga Talisay employees gipangayo kang Mayor Fernandez

Mga sakop sa City of Talisay Employees Union-Cebu ang miduso sa ilang yangungo ngadto ni Mayor Socrates Fernandez kabahin sa ilang anniversary bonus nga gusto nilang madawat niining tuiga.

Sa gipadangat nga suwat sa mga sakop sa union ngadto ni Fernandez niadtong Oktubre 19 gibutyag sa grupo nga si Edgardo Mabunay, city budget officer ug Viluzminda Villarante,  city accountant nagplano nga sunod tuig na ihatag ang maong  bonus kung dili sila makakuha og tinubdan sa pundo alang niini.

Ang union nagkanayon nga wala kini masubay sa Department of Budget and Management (DBM) Local Budget Circular No. 65 niadtong Marso 3, 1997 nga nagkanayon “there shall be no retroactive payments of milestone years”.

Ang mga sakop sa union nagkanayon usab sa ilang suwat nga niadtong Agosto 2006, ang city accountant adunay kasayoran nga ang Talisay City LGU dunay obligasyon sa paghatag og anniversary bonus sa mga kawani niining tuiga.

Ang union miduso usab sa ilang yangungo ngadto sa konseho sa dakbayan niadtong Martes.

Si Mabunay sa iyang bahin, sa pakighinabi niini sa Banat News kagahapon sa buntag nagkanayon nga nagkatigom na sila ug ang mga sakop sa union tali ni Fernandez ug natuki na ang maong problema.

Matud ni Mabunay nga ang siyudad nagpaabot og pundo nga magahin sa maong benepisyo sa mga kawani.

Gipasabot sa budget officer nga bisan sa mga balayranan sa mga maintenance ug operating expenses ang siyudad maghuwat pa og pundo nga magahin niini og valid appropriation.

Ang siyudad magkinahanglan og P1.6 milyones nga budget alang sa nahisgutang bonus sa 390 ka regular nga kawani kinsa matag usa niini ang modawat og P5 mil.

Gitataw ni Mabunay nga nangita pa siya og source of fund alang sa maong bonus.

Niadtong tuig 2002, ang mga kawani nakadawat og P3 mil matag usa nga anniversary bonus diin matag lima ka tuig nga milestone sa siyudad ang mga kawani niini makadawat usab og anniversary bonus.

Sa laing bahin, si Ariel Araw-araw sa Talisay city engineering office ug presidente sa CTEU-C nagkanayon nga si Atty. Owen Algozo, Talisay city legal officer mitataw nga adunay legal nga basehan ang paghatag og anniversary bonus ngadto sa mga kawani.