Usa ka negosyante og hayopan ang gitulis ug gitigbas patay sa wala mailhing tawo samtang nagsakay sa iyang motorsiklo paingon untang mamalit og hayopan sa usa ka tabo didto sa barangay Manguiao lungsod sa Asturias.
Nahitabo kini pasado alas 8 sa miaging buntag diha sa sitio Libaong barangay San Isidro sa samang lungsod.
Ang gitulis ug gipatay giila sa kapolisan nga si Diosdado Ordanisa, 52, minyo ug residente sa Buanoy lungsod sa Balamban.
Base sa gihimong pakisusi sa kapolisan, ang biktima nag-inusarang nangumpra og hayopan sakay sa iyang motorsiklo dihang siya giatngan sa wala mailhing tawo ug gitulis.
Ang biktima nakaangkon og duha ka dagkong samad tinigbasan sa ulo ug gagmay'ng samad sa bukton nga maoy nakaingon sa iyang hinanaling kamatayon.
Hinuon ang kapolisan sa maong lungsod duna nay lead nga duha ka tawo ang gituohang responsable sa maong pagpanulis ug pagpatay.
Si PO3 Dennis Nocos sa Asturias Police nga nahinabi sa Banat News miingon base sa ilang pakisusi sa kabanay nga ang biktima mamalit og manok ug kanding matag tabo sa nahisgutang lugar sanglit kasagaran nga dad-on nga kuwarta dili mominos P10,000.
Nagtuo si PO3 Nocos nga nisukol ang biktima sa wala mailhing tulisan tungod kay dunay gidak-on ang panglawas niini ug posibli usab nga armado og wala matinong kalibre ang mga tulisan.
Sa milabay'ng duha ka buwan laing negosyante nga nagsakay og motorsiklo paingon gihapon sa Manguiao ang gipusil diha sa susamang dapit apan suwerteng wala makabuto ang armas sa mga gidudahang tulisan.