Patong sa ulo ni Aves 'doble

Gidoble na karon ni Mayor Tomas Osmeña ang patong sa ulo ni Arestotle Aves alyas Ares, ang sakop sa Akrho fraternity nga suspetsado sa drive-by shooting niadtong Oktubre 4.

Gikan sa P150 mil nga cash reward nga gipatong sa mayor sa niaging tuig, gihimo na kini karong P300 mil ni Osmeña, samtang si ABC President Eugenio Faelnar sa iyang bahin sa linaing pakighinabi mipadayag kini nga gikan sa P150 mil himuon kining P250 mil.

Ang maong reward gipatas-an ni Osmeña human mohangyo si CCPO director Sr. Supt. Patrocinio Comendador nga dako kini og matabang alang sa dinaliang pagkasikop ni Aves.

Gawas sa maong kantidad, ang mayor mopalit usab og klarong hulagway ni Aves alang sa reprinting aron ipakatap kini sa tibuok dakbayan nga gahinan og P20 mil pataas.

Dugang niini, bayran usab sa mayor ang matag impormasyon nga iyang madawat, sama sa nahimutangan sa suspetsado, cellphone number niini, bisan gani sa iyang hinigugma nga dunay presyong P3 mil ngadto sa P5 mil matag kasayuran.

Nagtoo ang mayor nga sa ingon niini nga paagi masikop sa kapolisan si Aves. Si Aves kaniadto pa nahimong wanted sa dakbayan tulo na ka tuig ang nakalabay apan idlas kini kaayo.

 Si Faelnar sa iyang bahin sa pakighinabi sa Banat News nagkanayon nga mapaikag kini sa katawhan aron dili na magpanuko paghatag og impormasyon kabahin kang Aves.

Hinuon mipadayag kini nga angayang klaruhon lang gyud nga si Aves gyud ang suspek sa maong drive-by shootings ug dili lang “fall guy.”

Giawhag usab niya si Aves sa pagpatim-aw kung kini way kalambigitan sa maong mga insidente ug kini mipasalig nga walay dautang mahitabo kaniya.

Si Aves ug ang laing wala pa mailhing kauban niini gipasakaan na og kasong three counts of murders ug usa ka frustrated murder kabahin sa pagpamusil patay kanila ni Laurence Morados, 32, Lord Stephen Vasquez,18 ug William John Aznar niadtong gabii sa Oktubre 4, samtang ang kasong frustrated murder napasaka usab sa kaso ni Rendon Pelleren.

Duna pay laing tulo ka kasong gipaabot ang kapolisan nga isang-at ngadto sa piskalya batok kang Aves ug sa iyang kauban. Si Aves duna nay dili moubos unom ka warrants of arrest sa susamang mga kaso tungod sa pagkalambigit niini sa fratwars tulo na ka tuig ang nakalabay.

Samtang si Akrho regional chairman Richard Buscaino sa pakighinabi sa DyLA kagahapon nagkanayon nga dugay nang gisalikway sa ilang pundok si Aves human kini wala motubag sa imbestigasyong ilang gipasaka kaniya tulo ka tuig na ang nakalabay.

Samtang mipasalig kini hinuon nga motabang sa kapolisan ug ingon man kang Aves sa legal nga pamaagi kung gikinahanglan apan siya nagdudang dili si Aves ang nihimo niini gumikan kay dugay na kining wala dinhi sa Sugbu.