Pwedeng kasuhan kung positibo sa drug test – Oaminal

Ang abogado sa Philippine Drug Enforcement Agency (PDEA-7) Atty. Clarence Paul Oaminal miklaro nga ang mga kandidato sa barangay election mamahimong kasuhan o ma-disqualify sa kandidatura kun mamatud-an positibo sa ginadiling drugas.

Matud pa ni  Oaminal nga nahinabi sa Banat News nga usa ka dakong sayop nga argumento nga giduso karon sa pipila ka individual nga bisan kun ang usa ka kandidato   masakpang positibo sa paggamit  og ginadiling drugas human sa pagduso sa Certificate of Candidacy niini dili ma disqualify.

Gipasabot ni  Oaminal nga ubos sa Akta Republika 9165  Sec. 36 sa Implementation Rules and Regulation nakalatid niini ang unom ka mga mandatory requirements sa pagpa-drug test sa usa ka tawo ug usa na niini ang pagmando sa Comelec sa pagpangayog mandatory drug  test panahon sa election, pagpangayog drug test results sa driver license ingon man pagtugot sa paghupot og armas panahon sa election ug uban pa.

Nunot niini tataw kaayo nga magamit ang sec 15 nga maghatag og katungod sa Comelec sa pagpasakag kaso niadtong mga tiggamitan og ginadiling drugas diin mamahimong mapriso sulod sa usa ka tuig ug mawagtang ang katungod sa pagbotar kini kun ugaling nilapas  na sa maong salaod sa sobra sa usa ka higayon.

Iyang giklaro nga nunot sa maong  probisyon dili gyud makalikay ang mga kandidato nga ma-disqualify sa ilang kandidatura.