Nanawagan ang Simbahang Katoliko sa Sugbu ngadto sa mga batan-on nga nikandidato sa nagsingabot nga Barangay ug SK-election nga molihuk kutob sa ilang mahimo nga dili mag-apas sa suporta ilabina sa diktar sa mga karaang politiko kon Traditional Politicians (Trapo).
Ang tigpamaba sa Archdiocese sa Sugbu Monsenyor Achilles Dakay niluwat niining mao niyang panawagan human makita niini karun nga daghan na usab sa mga batan-on ilabina ang mga kandidato sa SK ang nisuon sa mga kandidato sa barangay nga nagpataka nalang og butang sa ilang mga campaign posters sa bisan asang dapit dinhi sa dakbayan nga wala gikonsiderar nga common poster area sa Comelec.
Gihagit ni Dakay ang mga batan-on nga dili mosunod sa mga estilo nga gisagop sa mga traditional politician nga maoy nakahugaw sa mga eleksyon nga ipahigayun dinhi sa nasud.
Gisayangan si Dakay sa huyang nga mga panghunahuna sa mga batan-on nga sayo kaayong gi-impluwensya ug gitudlo-an og dili maayong mga buhat sa mga politiko, “gikinahanglan gyud nga ipakita ang ilang pagka idealist”, dugang asoy ni Dakay.
Wala na hinuon mohatag pa og mensahe si Dakay ngadto sa mga karaang politiko tungod kay iyang namatikdan nga mag-usik usik lang sila sa laway tungod kay dili paminawon ug ibutang sa buot sa mga kandidato.
Apan gi-awhag ni Dakay ang publiko nga magmatngon ug mobutang pagbantay aron mapatunhay ang maki-angayon ug malinawon nga piniliay karung petsa 29 niining bulana.