Nangasilyas gipusil, napatay

Gipusil patay ang usa ka lalaki nga nagtuk-ong daplin sa baybayon samtang nitubag sa sugo sa lawas uban sa iyang asawa ug duha ka anak sa tawo nga nasuko lang nga giiwagan sa lighter sa biktima nga dunay flashlight.

Nahitabo kini niadtong Domingo sa gabii pasado alas 7 diha sa baybayon sa sitio Bulobogan barangay Tajao, diin ang biktima giilang si Romeo Guanzon, 28, residente sa maong dapit.

Ang gitumbok nga nipusil sa biktima giila nga si Ronnie Birao, 36, minyo ug nagpuyo ra usab sa nahisgutang dapit.

Segun sa report nga naabot sa Cebu Provincial Police Office ang biktima uban sa iyang asawa ug duha ka anak nangadto sa baybayon aron motubag sa sugo sa lawas.

Samtang didto na sila sa baybayon ang suspek nilabay sa ilang nahimutangan apan ang biktima nipasiga sa dala nga  lighter  diin gikonikan og flashlight nga gamay.

Giingong nasuko ang suspek nga giiwagan sa biktima ug gitionan hinuon og wala matinong kalibre sa armas.

Matud sa taho ang biktima niisa sa duha ka mga kamot ug nihangyo ngadto sa suspek nga dili lang sila hilabtan o ba kaha pusilon apan ang suspek kinsa nagtion nang daan sa armas nipusil gyud sa biktima kinsa naigo sa walang bahin sa dughan.

Daling gihatud ang biktima sa Toledo District Hospital apan gideklarar sa mga doktor nga dead on arrival.

Ang kapolisan pinangulohan ni SPO2 Delicio Esconde nisikop sa suspek didto sa ilang lugar sa gihimong follow-up operation.

Matud pang PO2 Peter Cuanso nga nahinabi sa Banat News  sa wala pa ang hitabo unang naagian ang asawa sa suspek ug gani gipangayoan pa og katahuran apan wala kini manumbaling ug nilahos sa nahimutangan sa biktima ug pagkaduol giiwagan sa lighter nga maoy gikasuko pag-ayo sa suspek ug namusil.