Radaza suportado sa konseho

Samtang gikalipay ni Efrain Pelaez ang pagpatunga karon sa Malacañang sa away tali niya ug sa kagamhanan sa dakbayan sa Lapulapu, si Mayor Arturo Radaza nakakuha og sempatiya ug suporta gikan sa konseho sa maong dakbayan.

Si Pelaez nagkanayon nga nalipay siya nga nasayod ang Malacañang sa panagbangi niya ug ni Radaza nga miresulta sa pagkasira sa pipila ka establisamento sa Marina Mall nga iyang gipanag-iya.

Nalipay si Pelaez nga si Presidential Management Staff director-general Sec. Cerge Remonde ang gipadala sa Malacañang aron maoy mohilot sa kasungian niya ug ni Radaza.

Matud pa ni Pelaez nga andam siyang molingkod uban ni Radaza sa pagpatunga ni Remonde.

Gikatakdang makigtigum si Remonde nilang Pelaez ug Radaza karong adlawa.

Si Bise Mayor Mario Amores nagkanayon nga adunay legal nga basehan ang kagamhanan sa dakbayan pagpasira sa operasyon sa Marina Mall.

Matud pa ni Amores nga ang gihimo sa mayor pagtuman lamang sa closure order human mapakyas ang tagdumala sa Marina Mall pag-asikaso sa mga rekisitos sama sa mga bayranan nga buhis ug kapakyas paglukat og permit.

Gisuportahan ni Amores ang baruganan sa mga abogado sa kagamhanan sa dakbayan nga nagkanayon nga ang kagamhanan sa Lapulapu adunay katungod pagkolekta og buhis ingon man pagpalukat og permit sa mga service enterprise sama sa mga tindahan sa Marina Mall bisan nahimutang sa Export Processing Zone, apan wala malambigit sa export operation.