Gunman sa drive-by shooting sakop sa Akrho

Ang notadong sakop sa Alpha Kappa Rho fraternity nga duna nay daghang kasong pagpatay ug pagpamusil dinhi sa dakbayan sa Sugbu ang gitumbok nga usa sa duha ka mga suspek sa nahitabong drive-by-shootings niadtong Oktubre 4 dinhi sa dakbayan.

Ang maong suspek nga giingong hitman sa maong grupo giilang si Arestotle Aves alyas Ares kinsa lumad nga taga Duljo-Fatima ning dakbayan samtang wala pa usab mailhi sa kapolisan ang kauban niini nga maoy nagmaneho sa motorsiklo.

Kasong three-counts of murder ug frustrated homicide ang gipasaka sa Cebu City Police Office, Homicide Section batok sa duha human sila gitumbok sa tulo ka mga eyewitnesses sumala pa sa kapolisan.

Samtang ang kaso gipalig-on usab sa mga gihulagway nga corroborative statements ug physical evidences gikan sa ubang source sa kapolisan nga nagtumbok kanila isip maoy mamumuno.

Kahinumduman ning bag-uhay lang, nasuta base sa resulta sa ballistics examination sa mga basiyo sa kalibre 45 nga mga balang narekober diha sa upat ka crime scenes sa dalan V.Gullas, Sanciangko, Ascension ug Uystengso nga usa ra ka armas ang gigamit.

Si CCPO director, Sr.Supt. Patrocinio Comendador nagkanayon dunay gitaganang P150,000 nga patong sa ulo ni Aves nga gibutang ang kagamhanan sa dakbayan aron mas mapadali ang pagpangita kaniya pinaagi sa mga impormasyong makuha gikan sa komunidad.

Sumala pang Comendador bugtong ang mga kabanay sa biktimang sila si Laurence Morados,32, Lord  Stephen Vasquez,18, ug William John Aznar,23, ug ang survivor nga si Rendon Pelleren mao pay nakapasaka og kaso batok kang Aves ug sa kauban niini.

Samtang ang laing tulo pa ka kasong frustrated murder nga ipasaka sa mga survivors nga sila si Jeffrey Romano, Rey Gonzales ug ang sakop sa Tau Gamma Phi nga si Mhako Buenconsejo,18, wala pa makumpleto tungod sa kakulang pa sa mga testigo.

Matud pang Comendador wala nila dali-dalia ang kaso gumikan lang sa mga pressure gikan sa mga kabanay ug sa nagkadaiyang sector sanglit gisunod nila ang proseso sa imbestigasyon niini ug gikumpleto ang angayang kumpletuhon.

“We have satisfied the object of our investigation. And we have not rush things up, we have filed the case at our own pace,” asoy pang Comendador.

Nanawagan si Comendador sa publiko sa pag-text sa police hotline 0921-49311616 o ba kaha pagtawag sa telepono 231-5801 ug 233-6795 kung duna silay impormasyon kabahin sa mga suspek.

Kahinumduman nga dunay gitukod nga Task Force Aves kaniadto ang CCPO aron pagpangita kaniya gumikan gihapon sa nagpatong-patong nga kaso, apan napakyas kini.

Karong subling gibanhaw ang TF Aves nga pangulohan ni Sr.Insp. George Ylanan aron pagpangita kaniya, niadtong milabay’ng tuig migawas ang balitang patay na si Aves sa Ormoc City human makakita og rambol apan wala kini tuohi ni Ylanan gumikan kay walay nakitang death certificate ug patay’ng lawas niini.