Mas daghang mga bata ang nabulahan sa CMP

Human sa malamposon nga unang hugna sa Caltex Mentor Program (CMP) sa Cebu niadtong buwan sa Pebrero ning tuiga, ang Chevron Philippines Inc., mihatag na pag-usab sa ilang gasa sa kaalam sa pagbasa ngadto sa 67 ka mga Stars kon Student at Risk sa duha ka mga tunghaan sa siyudad sa Lapulapu. Ug sa pagkakaron kaabag na sa Chevron Philippines niining maong proyekto ang Rotary Club of Mactan ug Rotary Club of Centra-Mactan.

Gikan sa 30 ka StARs sa unang hugna sa CMP sa Looc Elementary School, ang CMP  misaka ngadto sa 67 ka StARs sa Canjulao ug Timpolok Elementary Schools, sa siyudad sa Lapulapu.

Kini maoy tubag sa Chevron Philippines sa awhag sa mga opisyales sa dakbayan sa Lapulapu kinsa midayeg sa maong programa ug mihangyo nga ipahigayon  pa kini sa mas daghan pang tunghaan.

Ang ikaduhang hugna sa Caltex Mentor Program: "A Drive Towards Literacy," para sa duha ka tunghaan gilusad niadtong September 8 sa Canjulao Elementary School. Gitumong niining maong programa ang mga pampublikong tunghaan aron matabangan ang nagkadako  nga gidaghanon sa mga estudyante nga non-readers.

Ang mga opisyal sa DepEd ug mga magtutudlo sa duha ka tunghaan mihangop sa maong program tungod kay alang kanila dako kini og ikatabang aron ang ilang leksyon matudlo sa saktong oras ug dili na sila mabalaka sa mga non-readers nga maiwit sa klase.

Si Dra. Carmelita Dulangon, ang Division School Superintendent Lapulapu City midayeg sa Chevron Philippines alang niining talagsaon nga programa nga nihatag og pagtagad sa mga tinun-an nga nangulahi sa klase.

Si Dra. Dulangon miingon nga ang ubang mga kompanya mihatag lamang og scholarships niadtong mga tinun-an nga maayo og agi sa tunghaan ug napasagdan lang gihapon ang hinay ang performance sa gitawag og StARs nga napuno sa kaakohan sa mga magtutudlo.

"Bisan kami, wala makakita niining tabang nga gikinahanglan sa mga magtutudlo, ang Chevron lang ang nakakita niini ug nihatag og talagsaon nga  proyekto aron sa pagtabang sa karga nga gipas-an niining mga magtutudlo ug aron sa pagtabang nga mapauswag ang atong literacy rate," matud pa ni Dra. Dulangon.

"Ang among programa mas gipanindot na kay niabag na namo ang Rotary Club of Mactan, mas molapad na ang scope ug mas daghan nga StARs ang maapil tungod kay mas daghan man ang mentors nga mahatag sa Rotarians," matud ni William Pineda, ang manager sa Caltex Cebu-Terminal.

Ang CMP midaug sa IABC Gold Quill Award for Community Relations sa tuig 2003, ug finalist usab sa 2004 Asian CSR Awards. Niadtong tuig 2005, mikuha kini sa iyang ikatulo nga national award, ang Anvil Award of Excellence for Community Relations.