Bitang mosibog kun maka-liquidate si Ocarol sa koleksiyon

Gihagit ni Konsehal Mario Bitang si Kapitan Romeo Ocarol sa Barangay Pasil sa pag-liquidate sa tanang koleksyon sa ilang barangay bugti sa iyang pagsibog sa pag-atbang niini sa pagka-barangay kapitan karong piniliay.

Si   Bitang nga nahinabi sa Banat News nagkanayon nga dili na siya mohinayon sa pagdagan sa pagka-kapitan batok kang Ocarol ingon man mo-resign siya sa pagka-konsehal kun mahatagan sa kapitan og husay ang ilang katawhan labot sa mga nangahanaw nga minilyong koleksyon.

Si  Bitang kinsa maoy tsirman sa Committee on Finance sa barangay mipasangil sa lapad nga korupsyon ubos sa pamunoan ni  Ocarol kini tungod kay hangtod karon wala kini maka-liquidate sa kita sa water refilling station sa  barangay sukad sa tuig 2000 hangtod sa 2006 diin ang maong kaso naa na sa buhatan sa Ombudsman.

Sumala  pa niini nga sa iyang conservative nga estimate moabot  og kapin sa  P8 milyones ang halin sa   tubig sa  barangay  nga walay  official receipt sulod sa tuig 2000-2006.

Gawas pa niini, walay  proper accounting ang kapitan sa landing fee sa mga bangka nga modunggo diha sa Pasil, derby nga gi-promote niadtong Septembre 17, 2005 ingon man derby sa 2006 diin gigamit ang sports complex, kita sa Botica sa Barangay  ug P127 mil nga nadaog sa barangay sa Alaska  promotions.

Samtang gipasangil usab niini nahanaw usab ang koleksyon sa abang sa roof top sa barangay sa bisan unsang okasyon ingon man ang koleksyon sa sports complex   alang sa  pagpamalit og bola.

Iyang giklaro nga walay nahimong achievement si   Ocarol ug walay nakamahuan.   Ang kaso  ilang gisang-at  sa Ombudsman niadtong Marso 14, 2007.

Sumala pa niini nga ang iya karong plataporma mao ang pagpuo sa korupsyon diha sa barangay hinungdan nga mibarog siya alang  sa pagpapili isip barangay kapitan sa ingon mahatag ang tinuoray’ng serbisyo sa katawhan nga wala mahatagi’g pagtagad sa naglingkod nga administrasyon.

Samtang ang Banat News mikuha unta og reaksyon sa kapitan apan napakyas kini gumikan kay walay motubag sa telepono niini sa panimalay samtang wala usab makahibalo ang mga staff niini sa cellphone number.