Faelnar nanghagit

Gihagit ni Kapitan Eugenio Jingjing Faelnar si Atty. Salvador Solima pagluwat og under-oath affidavit sa pamahayag ug pasangil niini nga ang Comelec ug DILG adunay pabor nga gihatag sa kapitan alang   sa kandidatora niini.

Matud pa ni Faelnar nga si Solima nagpunay nalang karon og yawyaw.

Si Faelnar mipasangil nga si Solima mipagawas og mga poison letter ngadto sa mga sakop sa media batok kaniya aron mahulagway nga siya maoy mogawas nga bati ngadto sa publiko.

Si Solima gihagit ni Faelnar nga mopasaka og kasong disqualification karong nakasang-at na siya sa iyang certificate of candidacy.

 Si Faelnar nagkanayon nga ang mga pasangil ni Solima nakahatag   og kadaot sa imahen sa Comelec.

 Gipadayag sa kapitan nga nasusama na karon sa showbiz ang iyang kinabuhi gumikan ning mga pakulo sa maong abogado.

Samtang sa iyang bahin, si Solima mipadayag nga wala na kinahanglana nga moduso siya’g under-oath nga affidavit labot sa maong isyu  tungod kay ang iyang isang-at nga disqualification case batok kang Faelnar under-oath na kini ug igo na kaayo.

Iyang giklaro nga dili nalang unta magsige pa og panghagit si Faelnar batok sa iyang mga lakang nga pagahimoon aron wala kini tawo nga basulon sa pagka pandol unya niini sa maong kaso dili para kaniya bug-at ug adunay igong basihan nga dili kini qualified.

Giklaro usab ni Solima nga wala siya mopasangil ngadto sa Comelec nga nanikas apan ngadto mismo sa kapitan nga giingong manikas panahon sa election samtang simple lang usab kaayo ang opinyon nga gigamit sa kapitan sa iyang pagpapilig usab diin gibase sa DILG.

Kini tungod kay ubos sa balaod walay gahom ang DILG sa pag-amendar sa balaod niadtong napupos na ang termino hinungdan nga tubagon nalang ni Faelnar ang disqualification case nga iyang ipasaka dugang pa ni Solima.